Llienda de Xuanín del Osu

De LeonWiki, la enciclopedia libre.

Llienda de Xuanín del Osu

Siento no poder decir esto en llïonés, pero el caso es que -puestos a recoger leyendas o lliendas- he pensado que leer alguna en nuestro idioma tampoco está mal. Por eso, del espacio Filando hestorias que publica el Diario de León, he recogido este ejemplo, que me pareció encantador, contado con una apreciable y agradecida ternura. Espero que lo disfruteis.

Xepe Valle Carrera.

Yérase un matrimoniu de recién casaos que vivía ñu monte, cuidando'l fatu por ende p´arriba, pa la Fonte Pioyosa, xunto al Valdebuercu.

Un día, el maríu, que chamábase Xuan, hubo de baixare a La Baña, deixando sola a la muyere. Tenía de volvere pa la cena, pero pasóu'l tiempu, chegóu la ñueite y el maríu ¡qué ñun chegaba!. Hasta que yá mui tarde, cuando sólu andaban pol mundu la lluna p´arriba y los llobos p´abaixu, chamanun ña puorta; eilla corriéu a abrire asperando vere al sou Xuan pero ¡rediosla!, ñun yera'l maríu él que chamaba, siñon un osu grandísimu, l'osu que tenía atemorizadas a las xentes de tódolos puebros y aldeas d'aqueste llugare. Eilla corriéu asustada a ascuendese d'aqueilla fiera del diañi pero l'osu corriéu más, tomóula coñas suas manonas y llevóusela cautiva a la sua cueva onde fícieula la sou muyere, ¡cumu lu oyen!

Cuando yá emprecipiaba l'alboriada chegóu Xuan a la casa y al vere que eilla ñun taba dientru corriéu esesperáu por esos montes de Dious chamándola a gritos que partían l'alma. Pero ñon la encontrou enxamás y esesperáu el cuitadicu murriéu de pena al poucu tiempu.

Dende ñestoncias la muyere, que yera xoven y fresca cumu una rosina, tuviéu de vivire coñel osu, enchorando abichornada ñueite y día cumu una madalena.

Pasou'l tiempu y un día ñacieu-ye un fiyu al que-ye puso'l ñome de Xuan, en memoria del sou padre. Yera un rapacín preciosu, pero con una fuercia... ¡ai, madre, qué fuerzota tenía la criatura! Y coña sua madre y l'osu que los tenía acautivaos, vivíu Xuanín, medrando y faciéndose cada vez más grandón y más fuertón.

Un día, que yera fiesta de La Baña y l'osu había salido a cazare, la muyere sintíu ganas de baixare al beille del puebru y ñin corta ñin perezousa dixíu-ye a Xuanín: "¡Ai, mieu rapá, se pudiéremos emburriare la llouxa y llibranos d'aqueste aveseu...!" Ñestoncias Xuanín dixíu-ye que esu facíalu él coña deda pequerrina y ¡dito y feito!.

Pouco dempués la madre y el fiyu cheganun a La Baña y presentánunse ñu beille. ¡Ñaide podía creyere ñaquel milagru!.

Cuando'l osu volviéu a la sua cueva y viéula vacía emprecipióu a ruxire; dicían que los sous ruxios sintiénunse en mueitas lleguas ña rodiada.

Esesperáu rompiéu la llouxa que facía de puorta y corriéu llueu hasta La Baña en busca de la muyere y el rapacicu, pero los homes del puebru yá taban apreparaos con grandes palos y picos y ferramientas y cuandu'l osu chegou y viéu aqueillo, asustóuse y afuyóu espantáu carambillándose. Ñaide volvíu a velu enxamás de los enxamases pola Pioyosa, el Valdebuercu ñin por ñenguna parte.

Xuanín y la sua madre quedánun en La Baña. Eilla ñunca casóuse, la probina, pero vivíu curiada y protexida por "Xuanín del Osu", qu'asína yera cumu chamaban-ye las xentes. Y por dalgo debía sere, creo you, porque'l mozu escontra más años tenía, asemeyábase más a un osu y gustaba-ye más triscare por esos montes ñas ñueites de lluna grande; Hasta dicíase qu'a escondidiellas alcontrábase coñel osu qu'encautivou a la sua madre cuando yera recién casada, pero eso, si yía verdá ou ñon... ¡vaide tú a sabere!